ОМД- Да се обезбеди еднаков третман и почитување на правата на сите македонски пензионери, без оглед на тоа каде живеат.

Обединета Македонска Дијаспора (ОМД) беше контактирана од македонски пензионери кои живеат во странство, со барање да се отвори и адресира прашањето поврзано со нивниот нееднаков третман при последните зголемувања на пензиите.

Комисијата за спречување и заштита од дискриминација во своето официјално мислење утврди постоење на индиректна дискриминација врз основа на место на живеење во областа на социјалната сигурност и препорача надлежните институции да преземат корективни мерки во рок од 180 дена.

Ова мислење претставува јасна институционална основа за понатамошно постапување. Обединетата Македонска Дијаспора смета дека ова прашање бара отворен институционален дијалог, транспарентност и конструктивен пристап, со цел да се обезбеди еднаков третман и почитување на правата на сите македонски пензионери, без оглед на тоа каде живеат.

Како организација што ги застапува интересите на македонската дијаспора, ОМД останува отворена за дијалог и соработка со надлежните институции, граѓанските организации и сите засегнати страни, со цел да се придонесе кон правично и одржливо решение.

Ги повикуваме надлежните институции да го адресираат ова прашање со одговорност, транспарентност и целосно почитување на уставните и законските принципи, како и да отпочнат отворен дијалог насочен кон изнаоѓање правично и одржливо решение.

Обединетата Македонска Дијаспора останува подготвена активно да придонесе во дискусиите и процесите што ќе обезбедат еднаков третман и заштита на правата на сите македонски пензионери.”