Џошуа во април се враќа во рингот

Поранешниот светски првак во тешка категорија, Британецот Ентони Џошуа, ќе се врати во рингот на 1.април кога во Лондон ќе боксува против Американецот Џермејн Френклин, објавија промоторите „Matchroom“ и DAZN.

Изминатите две години Џошуа имаше две борби, и двете против украинскиот боксер Олександр Усик, кои ги загуби.

Усик во септември 2021 година го совлада Џошуа во Лондон со едногласна одлука на судиите и од него ја презеде титулата светски првак.

Една година подоцна во Саудиска Арабија, украинскиот боксер беше поуспешен и во реваншот со што ги одбрани титулите во верзиите WBA, IBF, IBO и WBO во тешка категорија.

„Психички и физички се чувствувам подготвен“, порача Џошуа пред најавеното враќање во рингот во лондонската О2 Арена.