Пашоли: Владините измени се реорганизација на неуспесите, Влен ги предаде интересите на Албанците
Пратеничката и потпретседателка од редовите на ДУИ вели оти заминувањето на министерот за здравство е признание за дебакл, додека назначувањата на новите министри во ресорите Локална самоуправа и Правда ги нарече директен удар врз Охридскиот договор
Собранието се очекува да ги изгласа новите владини измени, но она што се претставува како освежување на Владата всушност претставува само реорганизација на неуспесите и потврда дека политичките интереси имаат предност пред интересот на граѓаните, вели потпретседателката и пратеничка од редовите на Демократската унија за интеграции, Арбана Пашоли.
Таа вели оти министерот за здравство Азир Алиу ја напушта функцијата без да реализира ниту едно од ветувањата кои Влен ги дала на граѓаните во изборната кампања, алудирајќи на 74-те милиони евра кои беа ветени за Клиничката болнциа во Тетово, како и за меморијалниот парк за модуларната болница. Дополнително, неисполнети останале и клучните ветувања за изградба на шест регионални болници во регионите каде што живее доминантно албанско население, како и неизградбата на Универзитетски клинички центар во Тетово.
„Денес, по повеќе од две години владеење, ниту едно од овие ветувања не е реализирано. Нема шест регионални болници, нема Универзитетски клинички центар во Тетово, нема бесплатни здравствени прегледи за сите граѓани, општините не се опремени со итни медицински центри и амбулантни возила согласно ветувањето, а специјализираниот центар за лекување на рани и изгореници останува само уште едно неисполнето ветување. Затоа, заминувањето на министерот не претставува ниту реформа, ниту политичка одговорност. Тоа е јавно признание дека Влен не успеа да го одржи дадениот збор во здравствениот сектор. Неуспехот не се менува со замена на министерот; неуспехот останува бидејќи ветувањата кон граѓаните беа прекршени едно по едно“рече таа.
За неа, особено загрижува именувањето на Иван Стоилковиќ на чело на Министерството за локална самоуправа оти, како што рече, додека тој раководел со Министерството за односи меѓу заедниците, дозволил буџетот на институцијата која е задолжена за Охридскиот рамковен договор да биде трикратно намален.
„Денес, истиот човек е унапреден и ќе биде министер надлежен и за општините, вклучително и за оние што ги раководат двајцата копретседатели на Влен, Билал Касами и Изет Меџити. Билал Касами и Изет Меџити сега de jure ќе бидат подредени на Стоилковиќ. Ова е политичка иронија. Оние што тврдеа дека ќе ги штитат интересите на Албанците, денес се ставаат под политички надзор на министер кој не успеа да ја заштити ниту институцијата задолжена за спроведување на Охридскиот рамковен договор“вели Пашоли.
Опозициската партија го проблематизира и предлогот за нов министер за правда оти, како што велат, тој е познат по блискоста со професорката Тања Каракамишева и оти е поддржувач на Законот за правична и соодветна застапеност, кој според ДУИ е закон без етнички квоти, без механизми за спроведување и без санкции за дискриминација од институциите, што, додаваат, значи оти Владата нема намера да ја зајакне правната држава, ниту, пак, да го заштити духот на Охридскиот мировен договор, туку напротив, сака да го релативизира преку легализирање на можноста за избегнување на застапеноста.
„Овие измени не носат подобра Влада. Тие само потврдуваат дека Влен ги напушти ветувањата кон Албанците и се претвори во инструмент за реализација на агендата на своите коалициски партнери. Демократската унија за интеграција продолжи да го брани Охридскиот мировен договор, правичната и соодветната застапеност и интересот на граѓаните, спротивставувајќи се на секој обид за слабеење на стекнатите права и на институциите што ги гарантираат“,заклучи потпретседателката на ДУИ.
