Почнува судењето на Шон „Диди“ Комбс за рекетирање, трговија со луѓе и проституција

Судењето на Шон „Диди“ Комбс, еден од најуспешните рапери и музички могули во САД, започнува во Њујорк со избор на порота во понеделник.

Обвиненијата против него вклучуваат заговор за рекетирање, трговија со луѓе и транспорт за вршење проституција. Доколку биде осуден, може да се соочи со доживотен затвор.

Раперот се соочува и со десетици граѓански тужби од поединци кои го обвинуваат за користење на својата моќ за дрогирање, напад, силување, заплашување и замолчување на луѓе.

Раперот се изјасни за невин по кривичните обвиненија и ги отфрли индивидуалните тужби како обиди „за брза исплата“.

Во федералниот кривичен случај, Комбс е обвинет за заговор за рекетирање, две обвиненија за трговија со луѓе и две обвиненија за транспорт за вршење проституција.

Многу од најтешките обвиненија се однесуваат на обвинението за заговор за рекетирање.

Тоа вклучува обвиненија за киднапирање, дрогирање и принудување на жени на сексуални активности, понекогаш со употреба на огнено оружје или закани за насилство.

Во рација во неговата вила во Лос Анџелес, полицијата пронашла материјали за кои рекле дека биле наменети за употреба во оргии познати како „фрик-оф“, вклучувајќи дрога и повеќе од 1.000 шишиња бебешко масло.

Одделно, Комбс се соочува со голем број тужби во кои го обвинуваат за силување и напад.

Тони Базби, адвокат од Тексас кој се занимава со некои од овие случаи, рече дека повеќе од 100 жени и мажи од цела САД или поднеле тужби против рап-могулот или ќе го сторат тоа.

Диди Комбс е задржан во Метрополитен притворниот центар во Бруклин, Њујорк, од неговото апсење на 16 септември 2024 година.

Комбс – кој е познат и под имињата Пафи, Паф Деди, Пи Диди, Лав и Брат Лав – се појави на хип-хоп сцената во 1990-тите.