Почнува Заедничката операција на Фронтекс во Северна Македонија
Во Полицискиот тренинг центар во Ѓорче Петров, денеска на свечена церемонија ќе биде означено официјалното започнување на Заедничката операција на Фронтекс во Република Северна Македонија.
На свеченоста ќе присуствуваат премиерот Димитар Ковачевски, министерот за внатрешни работи Оливер Спасовски, извршниот директор на Фронтекс Ханс Лејтенс, амбасадорот на ЕУ Дејвид Гир и Лена Дупонт – член на Европскиот Парламент и известувач за Договорот за статус помеѓу ЕУ и Република Северна Македонија.
Предвидено е видео обраќање да има еврокомесарката за внатрешни работи Илва Јохансон, а прес-конференција да одржат Спасовски и Лејтенс.
Заедничката операција со Фронтекс ќе трае до 24 јануари 2024 година, со можност за нејзино продолжување, а има за цел поддршка на националните служби во граничната контрола и управувањето со миграциите, вклучувајќи ги и превенцијата, откривањето и спречувањето на прекуграничниот криминал, прибирањето и размената на оперативни информации и идентификувањето на можни ризици и закани, јакнење на оперативната соработка и поддршка на оперативните капацитети.
Планирано е во текот на 2023 година Фронтекс да распореди повеќе од 100 службеници, патролни возила и специјална опрема со што значително ќе се зголемат капацитетите за откривање на илегалните активности долж државната граница.
Договорот за ФРОНТЕКС беше потпишан на 26 октомври 2022 година во Скопје за време на посетата на претседателката на Европската комисија Урсула фон дер Лајен и прв ваков договор помеѓу ЕК и Република Северна Македонија на македонски јазик. Договорот отвора можност за воспоставување заеднички операции на европската Агенцијата за гранична и крајбрежна стража на територијата на Република Северна Македонија.
