Пратениците расправаат по Предлог-буџетот, пред албанскиот парламент протест на опозицијата

Албанската опозиција, како што најави, доцна попладнево одржа протест пред парламентот, додека во него втор ден по ред се расправа по Предлог- Буџетот за следната година.

Протестот, кој беше организиран во знак на незадоволство од „антисоцијалниот буџет“, траеше околу часа, имаше повеќе обраќања, преполни со нареди и обвинувања на адреса на „премиерот Еди Рама, владата“, но заврши без инциденти.

Насобраните, кои споредено со други протести беа во помал број, извикуваа „разбојници“ „ослободете ја Албанија од мафијата која е на власт“, а силно беше поддржано и барањето за формирање  „техничка влада, што ќе спроведе слободни избори“.

Во одреден момент ним им се придружија и дел од опозициските пратеници,  кои потоа повторно се вратија во собраниската сала.
Протестот беше обезбедуван од големи полициски сили, во непосредна близина имаше и противпожарни и амбулантни возила, како и цистерни со вода.

И протестот и пленарната седница почнаа со едноминутно молчење во знак на почит на 14-годишното момче кое вчера попладне беше избодено со нож од негов врсник.
Расправата по Предлог-буџетот продолжува со тензични моменти, но во поблага форма од претходниот неред што го создаваше опозицијата, која иако учествува во расправата се изјасни дека нема да гласа за него.