360-Пресек до 17 часот: Недостигаат уште околу 18 илјади гласа за успешни претседателски избори

Излезеноста на гласачите во вториот круг од претседателските избори до 17 часот изнесува 39,33 отсто, според обработени 99,18 отсто од избирачите, покажуваат податоците на Државната изборна комисија (ДИК) објавени на нејзината веб-страница, а кои се ажурираат сукцесивно.

Од вкупниот број избирачи запишани во единствениот Избирачки список – 1 814 317, вкупниот број избирачи што гласале до 17 часот е 707 657 од обработени 99,18 отсто.

За претседателските избори да бидат успешни, потребно е да гласаат повеќе од 40 отсто од вкупниот број запишани избирачи. Во апсолутни бројки, тоа значи дека од вкупните 1 814 317 избирачи на гласање треба да излезат најмалку 725 727 гласачи.

Според последните податоци на ДИК, до 17 часот гласале 707 657 избирачи, што значи дека за постигнување на цензусот недостигаат уште 18 070 гласа. Теоретски, и сите 15 илјади избирачи што не се обработени да гласале денеска, што е невозможно, цензусот сè уште не е постигнат, но е на добар пат да надмине 40 отсто.