Пресудата на Арбитражниот суд во Париз е во наша корист, информираат од кабинетот на Битиќи
.Со Пресудата, потенцираат од таму, е утврдено дека ЕЛ.ПЕТ нема право да бара пенали за периодот додека ОКТА не работела од 2012 до 2019 година, односно дека ова се последните пенали кои државата ги плаќа по основ на Договорот од 1999 година.
Оттаму прецизираат дека Арбитражниот суд досуди 21 478 797 долари за главниот долг од побаруваните 31 590 000 долари, како и затезна камата по ЕУРИБОР стапката која е негативна во претходниот период, наместо побаруваните 11 056 000 долари.
„Со тоа вкупно досудениот износ по основ на главното побарување до денес е околу 21 478 797 долари, што претставува околу 51 отсто од побаруваниот износ со тужбата. На ЕЛ.ПЕТ му се досудени и 787 334 евра за адвокатски и арбитражни трошоци од побаруваните 1 439 920 евра. Со Пресудата е утврдено дека вкупната количина на потрошен мазут на ОКТА во период 2008-2011 година изнесува 1 204 489 тони, така што на ЕЛ.ПЕТ му следат пенали од 27 долари по тон за 795 511 тони мазут“,прецизираат од Кабинетот на Битиќи.
Денеска соработникот за енергетика во Владата Виктор Андонов рече дека и оваа сума може да биде предмет на понатамошни усогласувања или договарања како што тоа е направено во 2008 година, кога е постигнат договор за порамнување.