СДСМ: Правосудството му служи на Мицкоски за кампања. Законот не важи за сите
СДСМ преку соопштение ја обвини власта за политичко влијание врз правосудството и двојни аршини во спроведувањето на законите, посочувајќи неколку случаи за кои бара одговори и одговорност.
Од партијата реагираат на излегувањето на Артан Груби од куќен притвор, кое, според нив, било проследено со факели, петарди и прослава. Воедно, прашуваат како Ива Михаилова ја поминала границата и покрај тоа што, како што наведуваат, ѝ биле одземени двата пасоша, а надлежните институции немаат евиденција за нејзиното излегување.
СДСМ обвинува дека полицијата се користи за партиски цели и го отвора прашањето за функционирањето на системот „Безбеден град“, за кој тврди дека е пуштен без законска рамка за контрола. Од партијата, исто така, се повикуваат на изјава на министерот во врска со софтверот „Пегазус“ и снимањето разговори на граѓани, тврдејќи дека станува збор за активности насочени кон партиски интереси.
Во соопштението се споменуваат и случајот со телохранителот на премиерот Христијан Мицкоски, за кого СДСМ тврди дека нападнал жени, непостапувањето по пријави за семејно насилство, како и случајот со пет тони дрога што, според партијата, поминале преку границата. Од СДСМ прашуваат и зошто пријавите за насилство не добиле соодветен одговор.
Партијата ја обвинува власта и за влијание врз обвинителството, наведувајќи дека Мицкоски поставувал обвинител преку телевизија и давал насоки од собраниската говорница и по телефон. Според СДСМ, Државната комисија за спречување на корупцијата и обвинителството ги отфрлаат пријавите поврзани со, како што ги нарекуваат, криминални тендери.
Од СДСМ се повикуваат и на извештајот на Европската комисија, кој го оценуваат како катастрофален, посочувајќи ги наводите за мешање на Мицкоски во правосудниот систем. Воедно, обвинуваат дека институциите реагираат на закани кон премиерот на социјалните мрежи, но не постапуваат соодветно по нападот врз младите во Ново Село и заканите кон партиски членови.
„Законот или важи за сите, или не важи за никого“, порачуваат од СДСМ, барајќи одговори за тоа како Михаилова ја поминала границата, како петте тони дрога ја минале границата, зошто телохранителот на Мицкоски е на слобода и зошто пријавите за насилство не добиле одговор.
Од партијата тврдат дека ВМРО-ДПМНЕ се меша во работата на правосудството и најавуваат дека власта ќе одговара пред независно судство, како и пред европската обвинителка Лаура Ковеши.
Извор: skopje1.mk
