Шефовите на дипломатии на НАТО членките ќе разговараат за војната во Украина и руските хибридни напади

Министрите за надворешни работи на членките на НАТО денеска отворија дводневен состанок во седиштето на Алијансата во Брисел, посветен првенствено на продолжување на поддршката за Украина да се брани од руската инвазија.

Украинскиот министер за надворешни работи Андриј Сибиха треба да ги извести своите колеги во НАТО за моменталната ситуација на линијата на фронтот, во време кога украинскиот источен фронт е под зголемен притисок од руските напади.

Се очекува Украина повторно да аплицира за приклучување кон западната воена алијанса, откако претседателот Володимир Зеленски објави дека неговата земја може да се согласи на прекин на огнот со Русија доколку НАТО заштити делови од земјата под украинска контрола.

„Ако сакаме да ја запреме оваа вжештена фаза од војната, мораме да ја ставиме територијата на Украина која е под наша контрола под капата на НАТО“, изјави Зеленски за британски „Скај њуз“.

Засега, алијансата одбива да и понуди членство на Украина поради страв дека руската инвазија би можела да ескалира во војна во која е вклучен и НАТО.

Министрите ќе разговараат и за потегот на Русија, која минатиот месец лансираше експериментална балистичка ракета кон Украина и ќе ги разгледаат потребите на Киев од противвоздушни системи.

Русија тврди дека нејзината нова ракета со среден дострел лансирана минатата недела над Днепро може да погоди цели низ Европа и дека противвоздушните системи не можат да ја спречат.

На дневен ред ќе бидат и одвраќањето и заштитата од руски хибридни напади и саботажни акции против членките на НАТО.

Со оглед на тоа што се очекува на средбата во вторник да пристигне јорданскиот крал Абдула Втори, може да се очекува и дискусија за тековниот конфликт на Блискиот исток и офанзивата на сојузот на бунтовничките групи во Сирија.