Собранието ја констатира оставката на Андовски, Вреди го пикира заменик-министерското место во здравство
Собранието констатира дека на заменик-министерот за здравство Јовица Андовски му прекина мандатот. Потпретседателот на собранието Антонијо Милошоски којшто претседава со пленарната седница рече дека Андовски не се изјаснил дека сака да ја образложи оставката пред пратениците.
Андовски вчера инмформираше дека оставката која му ја доставил на премиерот Христијан Мицкоски на 9 октомври ја поднел од лични причини и дека таа е депонирана во Собранието.
-Ви изразувам искрена благодарност за укажаната доверба, досегашната поддршка и соработката во текот на извршувањето на мојата функција. За мене беше чест и одговорност да бидам дел од Владата и да придонесувам кон унапредувањето на здравствениот систем. На претседателот на Владата и на сите членови на Владата им посакувам успех во понатамошната работа и во остварувањето на заложбите за подобро здравство и поквалитетен живот на граѓаните- вели Андовски.
Оставката на Андовски се поврзува со најавената реконструкција на вториот владин ешалон. „Слободен печат“ веќе објави дека според извори од Вреди заменик-министерското место во здравство ќе му припадне на албанскиот владин партнер. Освен ресорот здравство Вреди ќе има заменик министер и во Министерството за социјална политика.
Пред реконструкцијата на Владата, Вреди во тие ресори имаше министерски позиции. При реконстркцијата на Владата ресорите здравство и социјала ѝ припаднаа на ВМРО-ДПМНЕ.
Извор: slobodenpecat.mk
