„Студентски отпор“: Ако не се врати бесплатниот превоз, студентите ќе излезат на улиците

Младинското движење на студентите „Студентски отпор“ денеска соопшти дека студентите ќе излезат на улиците ако не се врати бесплатниот превоз.

– Министерството за образование и наука и ЈСП Скопје нека бидат свесни – студентите нема да молчат додека нивното право на бесплатен јавен превоз се гази поради нечија неспособност и суетност! Укинувањето на бесплатниот превоз е директен напад врз секој студент кој секојдневно се бори со нискиот студентски стандард и високите трошоци. Неуспехот на МОН да го исплати долгот е уште еден доказ дека оваа власт нема капацитет да ги решава вистинските проблеми на младите – се вели во соопштението.

Ако не се врати бесплатниот превоз веднаш, како што наведуваат, студентите ќе излезат на улиците!

– Нема да дозволиме образованието и пристапот до него да бидат жртва на некадарноста на властите. Борбата почнува сега! – се вели во соопштението од „Студентски отпор“