Судиите најавуваат предупредувачки протест на 28 април ако не бидат усвоени измените на Законот за плати на судиите
Управниот одбор на Здружението на судиите бара целосно исполнување на барањата дефинирани во Стратегијата и Предлог-активностите за реализација на Стратегијата за подобрување на материјалниот статус на судиите по сите 6 точки, доставени до Министерството за правда и надлежните судски институции.
На последната седница на Здружението одржана вчера е заклучено договорените измени за зголемување на коефициентот за пресметка на платите на судиите од најмалку 15 отсто да се усвојат од страна на Владата во најкраток можен рок, но не подоцна од две недели, како и Собранието да ги донесе измените на Законот за платите на судиите во најкраток можен рок, но не подоцна од 30 јуни 2022 година.
Доколку не се случи тоа, Управниот одбор донесе одлука за одржување на предупредувачки протест на 28 април кој ќе трае од 11:00 до 11:30 часот, велат од Здружението.
