Трамп му понуди на Зеленски нов договор за минерали
Администрацијата на Трамп ѝ понуди на Украина „подобрен“ нацрт-договор за минерали, откако претседателот Володимир Зеленски го налути американскиот претседател Доналд Трамп со одбивањето на неговата првична понуда, изјавија за Аксиос еден украински функционер, еден американски функционер и тројца извори запознаени со ова прашање.
Несогласувањето околу минералите предизвика поширока криза во односите оваа недела. Трамп го нарече Зеленски диктатор кој избра војна со Русија, а Зеленски го обвини Трамп дека верува во руски дезинформации.
Извори од двете страни сега велат дека е поверојатен договор.
Извор запознаен со ова прашање изјави за Аксиос дека неколку помошници го охрабриле Зеленски да го потпише ажурираниот предлог за да избегне понатамошен конфликт со Трамп и да му дозволи на американскиот претседател да ја оправда американската поддршка за Украина.
„Има значително подобрување во неодамнешниот нацрт и тој е во согласност со украинскиот закон“, рече изворот.
Советникот за национална безбедност на Трамп, Мајк Волц, вчера им рече на новинарите дека Зеленски мора „да се врати на маса“ за прашањето за минералите.
„Ова се преговори. А во преговорите вие преговарате. Украина сака да преговара за минерали, па за тоа зборуваме“, рече претставникот на Белата куќа.
Украина се наоѓа во област со значителни резерви на ретки минерали кои се клучни за најнапредните технологии. Вкупната вредност на минералите може да се мери во трилиони долари.
Договорот за минерали не е експлицитно поврзан со никакво решение за ставање крај на војната во Украина, но двете прашања драматично се испреплетеа оваа недела. Идејата за економско партнерство меѓу Украина и САД првично беше покрената од Зеленски минатиот септември, за време на состанокот со Трамп во Њујорк.
Минатата недела, три часа пред американскиот министер за финансии Скот Бесент да пристигне на средба со Зеленски во Киев, американскиот амбасадор го предаде нацрт-договорот за соработка во ископувањето минерали.
Нацрт-договорот наведува дека САД ќе добијат 50 отсто од минералите, дека договорот ќе биде предмет на јурисдикција на судот во Њујорк и дека ќе го замени секој друг трговски договор со Украина, според двајца извори кои го прочитале оригиналниот нацрт.
За време на нивниот состанок, Бесент му рекол на Зеленски дека Трамп инсистира веднаш да го потпише. Зеленски му рекол на Бесент дека не може да го потпише документот кој штотуку го добил.
Украинците исто така беа разочарани што американскиот нацрт не вклучува никакви безбедносни гаранции за Украина и дека тоа им се наметнува во време кога Украина беше исклучена од американско-руските преговори за нејзината иднина