(ВИДЕО) Филипче најави законско решение на СДСМ: 3 денари повеќе по килограм за лозарите

„СДСМ ќе понуди законско решение коешто се темели на барањата на лозарите, 3 денари повеќе по килограм произведено грозје. И законскиот предлог утре или задутре ќе го поднесеме во Собранието,“ изјави денеска претседателот на СДСМ, Венко Филипче.

Искрено се надевам, еве го контекстот на конструктивноста, дека власта ќе има слух и дека ќе ги поддржи лозарите, затоа што станува збор за една област од којашто живеат над 10.000 луѓе во Македонија, додаде тој.

Филипче потенцираше дека владата ги остави лозарите без поддршка, штитејќи го крупниот бизнис.

„Тоа дека лозарите не се задоволни, јас вчера го слушнав од нив самите. Тие кажаа дека цената на откуп на грозјето е недоволна. Владата, во однос на минатата година, откупната цена ја зголемила за само половина денар, притоа не ги вкалкулирала поголемите трошоци, нафта, работна рака, прскање на лозјата и други трошоци. Дополнително, не се калкулираат и 2-та денари субвенција по килограм што лани нашата влада ги даваше на лозарите. Значи практично, откупната цена оваа година е многу пониска. Лозарите имаат забелешка, којашто е на место – зошто се дава субвенција од 2 денари по литар вино на винарии за ланското грозје. Излегува дека е заштитен само крупниот бизнис, големите компании. Нема никаква логика.“ рече претседателот на СДСМ, Венко Филипче.