(Видео) Италија под вода: свлечишта рушат згради, жители на покриви чекаат спасување

18.11.2025 10:56
1,754 1 минута читање

Обилните врнежи што ја зафатија североисточна Италија за само една ноќ предизвикаа хаос, поплави и серија свлечишта, поради што локалните власти прогласија вонредна состојба во повеќе населени места во регионот Фриули-Венеција Џулија.

Во местото Брачан, во општина Крмин, огромна маса кал и земја се одделила од падината и целосно урнала трикатна станбена зграда. Спасувачките екипи од раните утрински часови се обидуваат да ги пронајдат исчезнатите жители – едно лице е извлечено живо, со тешка повреда на ногата, а уште двајца сè уште се водат како исчезнати.

Поради опасност од нови активирања на теренот, неколку семејства од околните улици се итно евакуирани. „Наврнаа огромни количини дожд во исклучително кратко време, ситуацијата е крајно сериозна“, изјави градоначалникот Роберто Фелкаро

За шест часа во Крмин наврнале дури 152 милиметри дожд, што предизвика брзо излевање на реките и ширење на поплавниот бран. Реката Идрија истекла од коритото, а Тер го поплавил селото Верса, каде што водата достигнала критично ниво.

Во Верса сцените се најдраматични: дел од жителите морале да побараат засолниште на покривите од сопствените куќи, додека чекале спасувачки тимови. Пожарникарите се пробиваат со мали чамци, а хеликоптери се обидуваат да стигнат до отсечените семејства.

На терен се испратени засилени екипи и од регионот Венеција. Од воздух може да се види големината на катастрофата – уништени патишта, срушени мостови, затворени сообраќајници и неколку населени места кои практично се отсечени од остатокот на регионот.

Спасувачките операции продолжуваат под многу тешки услови, а властите предупредуваат дека ризикот од нови поплави и свлечишта останува висок.

Back to top button
Close