ВИДЕО: Силно невреме во Истанбул, летаат покриви од згради и фасади, една жена почина

Катастрофално невреме попладнево го погоди Истанбул и други делови на Турција, при што загина најмалку едно лице, а нанесена е голема материјална штета на градот со 15 милиони жители.

Според турските медиуми, една жена е убиена во квартот Есенјурт во Истанбул, каде од силни удари бил откорнат дел од покривот кој паднал врз неа и врз нејзиното дете, јавува државната агенција Анадолија. Детето преживеало, но се здобило со тешки повреди.

На друго место во градот, ветрот сруши саат-кула, откорна дрвја и преврти најмалку три камиони. Најмалку осум лица се повредени.

Босфорот, тесен воден пат што го дели градот, е затворен за поморски сообраќај, а фериботите се откажани.

Најмалку шест летови на „Туркиш ерлајнс“ што требаше да слетаат во Истанбул се пренасочени кон Анкара и Измир, изјави портпаролот на авиокомпанијата.

Силните ветрови, исто така, ги принудија властите да ги откажат фериботите меѓу крајбрежните одморалишта Бодрум и Датка.