Во Франција, од почетокот на јули, 474 лица се приведени под сомнение за подметнување пожари

Од почетокот на јули досега во Франција се приведени 474 лица под сомнение за подметнување пожари, соопшти денеска Министерството за внатрешни работи на таа држава.

Меѓу приведените има 183 малолетници, или речиси 39 проценти од вкупниот број.

Француското МВР на почетокот на август објави дека две третини од апсењата се поврзани со сомнение за намерно подметнување пожар.

Нов шумски пожар избувна утрово во департманот Ланд во југозападна Франција. Во текот на ноќта, пожарот зафати околу 600 хектари, додека околу 500 луѓе беа евакуирани бидејќи пожарот се приближува кон населени места.

Франција сè уште е погодена од топлотен бран, а за денеска се предвидуваат температури од 35 до 38 степени Целзиусови, додека локално би можеле да достигнат 40 степени