Во Прилеп отворена изложба на Христина Зафировска
Во прилепскиот Центар за култура „Марко Цепенков“ денеска е отворена изложбата на дела од уметничката Христина Зафировска. Делата во акрилна техника ја откриваат преокупираноста на Зафировска со вирусот Ковид-19.
М-р Билјана Галоска, која ја отвори изложбата, нагласи дека уметничкиот стил на Зафировска се категоризира како дел од модерната, апстрактна уметност.
-Креативните дела од овој циклус се изработени во акрилна техника – мал формат, симболизирајќи ја микроскопската големина на вирусот кој стана реална закана за човештвото. Со мирни потези нанесени се глатки брановидни и испрекинати линии – патот по кој вирусот се движи, а точкестите сегменти иницираат на циркулацијата и ширењето на вирусот, рече Галоска.
Преку бојата, формата и начинот за визуелно претставување на делата, нагласи, го следиме уметничкиот стил на Зафировска, кој заслужено може да се категоризира како дел од модерната апстрактна уметност.