Западна Европа ги руши температурните рекорди. Просекот беше речиси три степени повисок

Западна Европа ги забележа најтоплите јуни и јули откако започнаа мерењата, со просечна температура од 21,62 степени Целзиусови. Ова е за 2,79 степени повисоко од просекот за периодот од 1991 до 2020 година, објави во понеделник одделот за климатски промени на европската програма Коперник, пренесува Хина.

На рекордните температури им претходеше невообичаено долг период на топлина што започна кон крајот на пролетта, за време на кој беа регистрирани четири топлотни бранови од крајот на мај.

Податоците, исто така, покажаа јасни температурни разлики низ целиот континент. Додека западот постави рекорди, температурите се намалија кон источна Европа и Скандинавија, каде што беше значително постудено.

Кога се гледа Европа како целина, јули беше само 11-тиот најтопол месец досега, со просечна температура од 20,49 степени.

Глобално, изминатиот месец беше вториот најтопол јули досега регистриран, изедначувајќи се со јули 2024 година. Просечната глобална температура беше 16,9 степени, 1,47 степени над прединдустрискиот просек.

Апсолутен рекордер останува јули 2023 година, кога просечната глобална температура достигна 16,95 степени. Податоците од Коперник се собираат од 1950 година, а за некои параметри се враќаат уште подалеку