Избришаното видео од телефонот на советничката Драгана Велковска – навреди за инспекторите поради казна за паркирање
На социјалните мрежи повторно се појавија делови од видеото кое се емитуваше во живо на Фејсбук од телефонот на советничката во Град Скопје, Драгана Велковска во кое се слушаат навреди за инспекторите поради казна за паркирање.
Инспекторат на Град Скопје соопшти дека во петокот попладнето при извршување на своите работни задачи, инспектори биле снимани од советничката Велковска и добивале закани од неа.
,,Попладнево на бул. Климент Охридски нашите инспектори казнуваа непрописно паркирани возила на тротоарот зад Соборниот Храм. На тротоарот непосредно до угостителскиот објект „Веган Кујна“ беа затекнати две возила, а сопствениците излегоа од објектот, одбија да се легитимираат и ги однесоа своите возила.
Повикана беше и полицијата, откако инспекторите почнаа да добиваат закани за роднински врски со членови на Советот на Град Скопје. Подоцна на местото пристигна и советничката Драгана Велковска која продолжи со заканите и навредите кон инспекторите, неовластено ги снимаше и пренесуваше во живо на социјалните мрежи.
Инспекторатот на Град Скопје сака да подвлече дека нема намера да прави компромиси со узурпацијата на јавните простори со возила, без разлика дали се работи за функционери од било која политичка партија. Како и во многубројните досегашни акции за непрописно паркирани возила на велосипедските патеки и тротоарите на овој булевар, и во овој случај сите затекнати возила добија казна во висина од 50 евра“, соопшти инспекторатот во петокот.
Велковска тврди дека инспекторите биле испратени од градоначалникот Шилегов за да ѝ се одмаздат поради нејзините јавни објави за штетното работење на градот:
,,По моите објави за штетните одлуки што ги носи Советот на Град Скопје, денес Петре Шилегов ми испрати партиски полтрончиња „комунални инспектори“ од Град Скопје да ми вршат притисок за јавно искажана критика и да „спроведуваат закон“ кој не знаеја да го именуваат, а камоли да наведат негов член. Се паркирале како да гонат тешки криминалци кај мене пред локал. Ѝ ја блокирале колата на мајка ми, ја фотографирале и едниот од нив одбивајќи да ѝ покаже службена легитимација, барал таа да му ја даде нејзината лична карта за да може да ѝ пише казна.
Бидејќи знам дека партиските војничиња поим немаат од животот, да нагласам уште еднаш дека согласно со Законот за инспекциски надзор, инспекторот е должен да се легитимира
„Легитимирање на инспекторот-Пред започнување на вршењето на инспекциски надзор, инспекторот е должен на субјектот на инспекциски надзор да му ја презентира својата службена легитимација и значка.“
Партиското полтронче што самото си кажало дека му прави услуга на Шилегов – кој лично ми дошол пред локал денес (која чест!) – се вика Михајло Ѓорѓиевски. Во понеделник чекам информација кога Михајло е вработен, дали е вработен со „потребата од зголемување на администрацијата поради зголемен обем на работа“ во последните 3 години. Не ми е првпат да ми доаѓа „инспекција што спроведува закон“ непосредно по моја јавно искажана критика против Шилегов и „неговите“. Што и да си мислите дека ќе постигнете, шарлатани, спротивното ќе се случи“-напиша таа.
