Галетановски: Нека се живи и здрави животните, оти зоолошката сега може да соработува со етно-села и зоолошки кои не се кандидати на ЕАЗА

Поранешниот директор на скопската зоолошка градина, Ѓорѓи Галетановски, во изјава за Либертас објасни што за скопската зоолошка градина значи губењето на членство во ЕАЗА.

-Со неверување ја прочитав веста, се јавив кај некои колеги директори на европски зоолошки и ми ја потврдија. Зоо Скопје е кандидат за член на Европската асоцијација на зоолошки и аквариуми (Еаза) од 2007-ма година. Кога ме назначија ветив дека во мојот мандат ќе работиме за влез во Еаза бидејќи тоа значи покрај помошта што ја добиваме како кандидати – добивање и размена на животни, стручни совети најважното е финансиска помош на големи проекти, живеалиста паркови итн. – изјави Галетановски.

Потенцираше дека доколку зоолошката градина станала член на Еаза тоа би значело дека ќе станела и финансиски независна од буџетот на град Скопје и С. Македонија.

-Јас во мојот предвреме завршен тригодишен мандат остварив контакти со многу европски зоолошки и сите ни помагаа. Со мојот тим работевме само во насока Скопје да добие европска зоолошка, изградивме живеалишта за пингвини, фламинга, ги доградивме живеалиштата за слонови и шимпанза, ги донесовме новите животни, слоновите шимпанзата, белите лавови пунгвините фламингата сибирските волци, изградивме дино парк но фати пандемијата и не закочи во изградбата на аквариумот. Закажавме последен скрининг, требаше да дојдат координатори од ЕАЗА и да утврдат состојба, но јас веќе бев заминат од Зоо. Зошто ја прекинале комуникацијата и не направиле ништо цели две години не знам, а и веќе не е важно. Поважно е сега да бидат живи и здрави овие животни што ги имаме бидејќи моментално зоолошката мозе да соработува само со етно села и зоолошки кои не се кандидати, нити членови на ЕАЗА.