Ховениер: Во Косово има активни злонамерни странски актери кои ја поткопуваат демократијата

Американскиот амбасадор во Косово Џефри Ховениер денеска оцени дека на Косово има „активни злонамерни странски актери кои сакаат да ја поткопаат косовската демократија искористувајќи ги етничките поделби“.

На конференцијата за информативен интегритет DISICON, организирана од Националниот демократски институт (НДИ) со седиште во Вашингтон, амбасадорот рече дека е неопходно да им се застане на патот на овие злонамерни актери, додавајќи дека дезинформациите може да имаат директни последици врз изборните резултати, на изборите што наскоро треба да се одржат во Косово.

Амбасадорот Ховениер, кој на крајот на декември го завршува својот мандат во Косово и заминува во пензија, денеска рече дека САД остануваат посветени на Косово како разнолика земја и на поддршката на независните медиуми, вклучително и оние што ги водат малцинствата.

„И ние сме многу свесни дека медиумите обезбедуваат непристрасни и точни информации. Свесни сме дека има некои кои се обидуваат да го искористат ова тврдење за да направат нешто многу поинакво, да пренесат порака која е насочена кон многу, многу различни цели отколку информирањето на заедницата.Тоа мора да се осуди и ние мора да ги поддржиме независните медиуми“, рече Ховениер