Американскиот министер за одбрана Пит Хегсег: Со „Полноќен чекан“ ги уништивме нуклеарните планови на Иран

Американскиот министер за одбрана Пит Хегсет денеска изјави дека американските воени напади врз иранските нуклеарни постројки ноќеска имаа неверојатен и огромен успех што ги уништи нуклеарните амбиции на Техеран. Нападите на САД вклучувале 14 бомби-разбивачи на бункери, повеќе од дваесетина ракети „томахавк“ и над 125 воени авиони, во операција за која генералот на воздухопловните сили Ден Кејн рече дека е наречена „Операција полноќен чекан“.

Операцијата го турка Блискиот Исток на работ на голем нов пожар во регион кој веќе гори повеќе од 20 месеци со војни во Газа и Либан и соборен диктатор во Сирија.

„Нуклеарните амбиции на Иран се уништени“, изјави Хегсет на брифинг, додавајќи дека нападите не биле насочени кон ирански трупи или луѓе. „Операцијата што ја планираше претседателот Трамп беше смела и брилијантна, покажувајќи му на светот дека се врати американската превентивност. Кога овој претседател зборува, светот треба да слуша“, рече Хегсет.

Администрацијата на Трамп изјави дека нападот врз три ирански нуклеарни објекти не бил за соборување на владата на земјата.

„Оваа мисија не е и не била за промена на режимот“, изјави министерот за одбрана Пит Хегсет.

Генералот Кејн, претседател на Здружениот штаб на вооружените сили, нагласи дека целта на „Операцијата полноќен чекан“ ги уништила нуклеарните централи во Фордо, Натанц и Исфахан.

„Конечната штета од нападот ќе потрае некое време, но првичните проценки на штетата покажуваат дека сите три локации претрпеле исклучително сериозна штета и уништување“, рече Кејн.

Хегсет изјави дека и покрај ненадејниот напад врз иранските нуклеарни централи во текот на ноќта, Америка „не бара војна“. Хегсет рече дека е важно да се напомене оти американските напади не биле насочени кон иранските трупи или иранскиот народ, што е прикриен обид да му се покаже на Иран дека не сака одмазда врз американските цели во регионот.

Хегсет рече дека одлуката да се преместат голем број бомбардери „Б-2“ од нивната база во Мисури во текот на вчерашниот ден била наменета да биде мамка за да се одвратат Иранците. Тој додаде дека САД користеле и други методи на измама, распоредувајќи борбени авиони за да ги заштитат бомбардерите „Б-2“ кои фрлија 14 бомби за уништување бункери врз најмоќната нуклеарна база на Иран. Тој рече дека сите овие тактики им помогнале на САД да ги фрлат бомбите без да ги откријат борбените авиони на Иран или неговите воздушни ракетни системи.

Неколку часа откако највисокиот дипломат на Иран откри дека линијата на комуникација меѓу Вашингтон и Техеран останува отворена, Хегсет ги повтори неговите забелешки на прес-конференција.

„Можам само да потврдам дека има и јавни и приватни пораки што се доставуваат директно до Иранците преку повеќе канали, давајќи им ја секоја можност да седнат на преговарачката маса“, рече Хегсет.

Мапата на патеката на летот што ја поминале невидливите бомбардери Б-2, објавена од Пентагон, покажува дека нивното приближување кон Иран ги одвело над Медитеранот, а потоа над Израел, Јордан и Ирак. Не е јасно кога овие три земји биле информирани за летовите. Израел соопшти дека американските напади биле извршени во координација со нивната војска. САД соопштија дека во нападите не биле вклучени израелски авиони. Пентагон ја објави мапата за новинарите, давајќи детали за мисијата, која ја опиша како предизвикување „екстремно сериозни штети и уништување“ на три ирански нуклеарни постројки.

Додека САД и регионот чекаат одговор од Иран на ноќните напади, Хегсет рече дека воените генерали ги засилија мерките за заштита на силите низ целиот регион, особено во Ирак, Сирија и Персискиот Залив.

„Нашите сили остануваат во состојба на висока готовност и се целосно подготвени да одговорат на каква било иранска одмазда или напади преку посредници, што би бил неверојатно лош избор“, рече Хегсет.

На крајот од брифинг, шефот на одбраната на САД се обиде уште еднаш да ја повтори неподготвеноста за интервенцијата на Америка во Иран да се претвори во долготрајна војна и ги означи нападите во текот на ноќта како „намерно ограничени“.

„Би рекол само, како што претседателот наложи и јасно стави до знаење, ова сигурно не е неограничено“, рече Хегсет, додавајќи дека тоа не ја ограничува способноста на САД да реагираат и дека ќе го сторат тоа ако е потребно.

„Најмоќната војска во светот е позиционирана и подготвена да го брани нашиот народ“, рече Хегсет.

Извор: Фокус