Топлотниот удар може да биде фатален

Малите деца, постари лица и пациенти со срцеви проблеми се особено изложени на ризик. Но, и кај луѓе без хронични заболувања, при екстремна жештина, телесната температура може да ја надмине опасната граница од 40 степени

При екстремна топлина може да дојде до сончаница – прегревање на главата и мозокот, поради прекумерно изложување на главата и вратот на сонце. Ова може да доведе до класични симптоми како што се главоболка и гадење.

Топлотен удар влијае на целото тело. Причината не мора нужно да биде премногу сонце. Прекумерното користење на сауна или физички напор при голема жештина и во задушлива средина, исто така, може да доведе до топлотен удар.

Автомобилот како рерна

Кога температурата надвор е 32 степени Целзиусови, внатре во автомобилот по половина час температурата се искачува на 48 степени, а по еден час на 58 степени. Тоа е опасно по живот, бидејќи човечкото тело мора да може да одржува температура од 37 степени. Кај луѓето погодени од топлотен удар, телесната температура се искачува на 40 степени. Тоа не е само непријатно, туку може да доведе и до смрт.

Бебињата и малите деца се особено изложени на ризик, бидејќи нивното тело нема толку многу потни жлезди како телото на возрасните, кои имаат помеѓу 150 и 350 на квадратен сантиметар кожа. А тие жлезди, меѓу другото, имаат задача да го ладат нашето тело. Бројот на жлезди зависи од делот од телото, а најголема концентрација е на дланките и стапалата – помеѓу 360 и 370.

Изложеноста на екстремни температури е опасна и за постарите лица. Честопати овие луѓе имаат проблеми со притисокот или проблеми со срцето. При екстремна топлина, срцето мора да работи многу понапорно отколку на нормални температури. По операција на срце или ако крвните садови се оштетени, постарите лица се изложени на ризик од топлотен удар.

Но, дури и целосно здрави луѓе, кои ретко имаат здравствени проблеми, при голема жештина не се безбедни. Да речеме, ако тренираат напорно за време на екстремна горештина и ја надминат границата. Ова важи и за луѓе кои извршуваат тешка физичка работа во жешки денови на сонце – како што се работниците на патиштата.

Потењето е од витално значење

Кога надворешната температура е висока, протокот на крв во кожата се зголемува и телото се обидува да се олади преку кожата и протокот на крв. Почнуваме да се потиме. Капките пот на кожата испаруваат и на тој начин го ладат телото до одреден степен. Но, кога доаѓа екстремна жештина, системот за ладење може да откаже.

Секој ден губиме помеѓу половина литар и неколку литри течност, 99 проценти од таа течност е вода.

Еден вид потна жлезда, стручно наречена екрина жлезда, е одговорна за регулирање на телесната температура на една личност. Повеќето од овие жлезди се наоѓаат под пазувите, дланките, но и на челото. Нивниот дијаметар е до 0,4 милиметри.Нашето тело има помеѓу два и четири милиони од овие ситни жлезди. Потта се произведува во делот од жлездата што изгледа како топче од волна. Еден канал ја води потта до површината на кожата. Таму, течноста се распределува во форма на ситни капки пот. Додека тоа функционира, нашето тело се справува со жештината.

Но, ако повеќе не е во можност да го користи сопствениот систем за ладење, станува опасно – се заканува сончев удар.

Сончаница – важно е да се задржи смиреност

Кога некое лице ќе добие сончев удар, неговото тело е прегреано и најчесто главата предолго била изложена на сонце. Главоболката е обично првиот симптом на сончев удар. Други симптоми се болки во грбот, исцрпеност, а понекогаш и гадење и повраќање.

Овие симптоми се предизвикани од прегревање на мозочната мембрана. Така, може да се појави таканаречен асептичен менингитис, воспаление на мозочната мембрана кое не е предизвикано од бактерии. Засегнатите лица обично доживуваат вртоглавица, дезориентација, во некои случаи и губење на свеста. Тогаш е неопходна медицинска помош.

Жена пие вода од шише за време на голема жештина пред Колосеум во Рим, ИталијаЖена пие вода од шише за време на голема жештина пред Колосеум во Рим, Италија

Луѓето кои добиле сончев удар мора веднаш да бидат однесени во ладна средина и мора да бидат легнати на грб. Главата и горниот дел од телото мора да бидат подигнати. Влажни ладни марамчиња можат да помогнат во ладењето на одредени делови од телото, како што е вратот. Болните лица треба да пијат многу течности.

Топлотниот удар е катастрофа за организмот

Поопасен од сончевиот удар е топлотниот удар – тој предизвикува покачување на внатрешната температура до 40 степени. Тогаш е можно да се појават нарушувања на видот и отежнато дишење. Таквата состојба може брзо да стане опасна по живот. Телото повеќе нема ни еден единствен начин да ја намали телесната температура. Пулсот се забрзува, дишењето се прекинува, крвниот притисок паѓа.

Ова може да доведе до воспаление и сериозно оштетување на некои органи. Ако на пациентот не му се помогне навреме, може да дојде до целосно откажување на органите.

За време на екстремни жештини, нашето природно телесно ладење брзо ја достигнува својата граница. А постарите луѓе често не пијат доволно течности. Телото тогаш не може да произведе доволно пот, па затоа не може ни да се олади.

Во многу случаи е најдобро да се повика лекар. А како да се избегнат сончаница или топлотен удар? Одговорот е едноставен – што е можно помалку изложување на сонце на екстремна жештина и внесување на што е можно повеќе течности во телото.(dw)