Русија интензивно го милитаризира полуостровот Кола во Арктичкиот круг, складирајќи нуклеарно оружје?
Норвешкиот министер за одбрана Торе Сандвик предупреди дека Русија брзо го милитаризира полуостровот Кола во Арктичкиот круг, складирајќи нуклеарно оружје и подморници како подготовка за можен конфликт со НАТО.
Во ексклузивно интервју за британскиот „Телеграф“, Сандвик откри дека Осло го следи „најголемиот арсенал на нуклеарни боеви глави во светот“ насочени кон западните сојузници.
„Русија гради на полуостровот Кола. Северната флота и еден од најголемите нуклеарни арсенали во светот се наоѓаат таму. Тие боеви глави не се насочени само кон Норвешка, туку и кон Велика Британија, и на половина пат кон Канада и САД“, рече Сандвик.
Полуостровот Кола, на крајниот северозапад од Русија по границата со Норвешка и Финска, е клучен за стратегијата на Москва за „втор удар“ – способноста да започне разорен контранапад по првиот нуклеарен удар. Според норвешките разузнавачки служби, Русија таму тестира хиперсонични ракети, торпеда и нови боеви глави.
„Тие имаат нови фрегати и повеќенаменски подморници развиени во изминатите две години. Најмалку 16 нуклеарни подморници. Тоа е најголемата закана“, предупреди Сандвик.
Целта на Москва е да ја преземе контролата врз клучни морски рути. Тоа е Мечкиот премин (помеѓу Норвешка и Свалбард) единствениот излез на руската флота во Атлантикот и GIUK Gap (Гренланд-Исланд-Велика Британија) – виталната трансатлантска линија за снабдување на НАТО.
„Путин сака да го забрани пристапот до тие рути. Ако ги контролира тие премини, може да ги блокира испораките и поддршката во војната“, објасни норвешкиот министер.
Норвешка, со поддршка на Велика Британија и САД, ги следи руските активности „24 часа на ден, 7 дена во неделата“. „Тоа е најважниот надзор во НАТО“, истакна Сандвик.
Сандвик дополнително предупредува дека дури и ако војната во Украина заврши со мировен договор, Арктичкиот круг ќе стане „следното големо безбедносно бојно поле“. „Путин не е заинтересиран за мир. Ако може, ќе се врати – можеби со милиони војници по границата со Финска“, додаде тој. „Русите нè гледаат – и сакаме да видат што правиме“, заклучи норвешкиот министер во интервјуто.
