Јеменскиот претседател најави офанзива против Хутите и вети амнестија за сите кои ќе го положат оружјето
Јеменскиот претседател Рашад ал-Алими денеска го објави започнувањето на офанзива насочена кон враќање на контролата врз целата земја, чиј поголем, северозападен дел е контролиран од проиранските Хути, кои ги засилија нападите врз владините сили и нивниот саудиски сојузник.
„Денеска објавувам воени операции кои ќе бидат насочени кон враќање на преостанатите територии на Републиката и проширување на овластувањата на државата и нејзините институции на целата национална територија“, рече Алими, при што големи делови се контролирани од Хутите.
Неговата објава следеше по низата неуспеси на јеменските владини сили и нивниот саудиски сојузник, особено за време на блицкригот што го започнаа Хутите во септември, што им овозможи да заземат огромни делови од брегот на Црвеното Море на Јемен.
Безбедносни извори и очевидци наведуваат дека Хутите денеска пресекле клучна артерија што ги поврзува Таиз, голем град на југозападот од земјата, и Аден, седиштето на меѓународно признатата влада.
Алими ги повика „вооружените сили, безбедносните сили и сите воени единици да почнат да ги извршуваат доделените мисии во согласност со одобрените планови, сè додека земјата не се ослободи од стисокот на терористичката милиција Хути“.
Алими денеска им вети амнестија на сите оние кои ќе го положат оружјето и ја повика меѓународната заедница да застане на страната на Јемен во борбата против проиранските бунтовници Хути.
Во своето телевизиско обраќање, претседателот на ова извршно тело на меѓународно признатата влада на земјата рече дека владата ќе преземе „национална одговорност во соочувањето со проиранските бунтовници Хути“ бидејќи сите опции за деескалација се исцрпени, јавува Ал Џезира.
„Секој град што ќе го вратиме ќе влезе во фаза на закрепнување и реконструкција.
Гарантираме безбедно враќање и амнестија за сите што ќе го положат оружјето. Ги повикуваме пријателите и меѓународната заедница да застанат со Јемен. Го знаеме патот до победата и големината на одговорноста пред нас. Ќе ги заштитиме водните патишта во име на целиот свет“, рече ал-Алими.
Тој го повика населението во областите контролирани од Хутите да соработува со јеменските вооружени сили и најави воена кампања за враќање на преостанатите области под контрола на бунтовниците.
