Атлантик: Белата куќа бара воени опции за напади врз Иран пред изборите

Белата куќа побара од Пентагон да подготви воени опции што вклучуваат напади врз цели во Иран пред среднорочните избори за Конгресот, закажани за 3 ноември, објави магазинот „Атлантик“, повикувајќи се на двајца претставници на американската администрација.

Според тие претставници, планирањето го одразува притисокот на претседателот Доналд Трамп да ги намали цените на горивата и да покаже напредок во воениот конфликт пред почетокот на гласањето.

Американски функционер изјави за „Атлантик“ дека Централната команда на САД (CENTCOM) изготвува оперативни планови, додека администрацијата сè уште го разгледува обемот на можните напади, нивните цели и времето на нивното извршување.

Поддржувачите на воените планови веруваат дека дополнителните акции по периодот на релативен мир би му овозможиле на претседателот да покаже сила и да прогласи победа, што, според нивна проценка, би можело да им помогне на републиканските кандидати. Сепак, тие велат дека само ограничените напади нема да го принудат Иран да се врати на преговарачката маса, да воспостави безбедна пловидба низ Ормуската Теснина или да ги намали цените на горивата пред денот на изборите.

Неименуван извор од Републиканската партија, запознат со разговорите, изјави за „Атлантик“ дека претседателот „ќе изгледа како да победил, а цените на бензинот ќе почнат да паѓаат“.

фото Атлантик-Веб