Нов скандал со амбасадоркaтa на Трамп во Грција: „Душо, уплати ми 100.000 долари на картичката“

Кимберли Гилфојл, амбасадорка на САД во Грција, поранешна свршеница на Доналд Трамп помладиот и една од луѓето блиски до семејството Трамп, се обратила до донатор на Трамп со необично барање додека се подготвувала за конгресно сослушување за нејзината номинација. Таа побарала подмирување на својот долг од 100.000 долари на картичката American Express, но на начин што нема да остави писмена трага. Минатата недела, демократските членови на комисиите за надворешни работи на Сенатот и Претставничкиот дом побараа од Стејт департментот да го испита однесувањето на Кимберли Гилфојл. Притоа, тие се повикаа на претходни медиумски написи за нејзината промоција на грчка компанија, чиј лобист патувал со неа на состаноци со влади на Балканот. „Нема да те видат никаде ако уплатиш пари директно на American Express“, напишала таа преку апликацијата Signal, според пораките во кои имале увид од весникот Wall Street Journal. „Те молам, душо“, додала таа. Гилфојл со месеци комуницирала со Ерик Детерс, поранешен кандидат за конгрес од Кентаки. Тој ја замолил да го искористи своето влијание во новата администрација на Трамп за да му помогне со неговите лични даночни и правни проблеми. За возврат, ѝ ветил исплата до милион долари ако успее. Пораките и тврдењата на Детерс покажуваат дека Гилфојл ги понудила своите услуги. Таа му ги проследи пораките што наводно ги испратила до новиот шеф на Службата за внатрешни приходи (IRS) и го информираше за лобирањето во Министерството за правда. Но, како што се приближувала нејзината потврда, Гилфојл инсистирала дека мора да го подмири долгот на нејзината картичка. „Душо, те молам, треба да го решиш ова денес“, му пишала таа на Детерс на 3 јули 2025 година, неколку дена пред сослушувањето на 9 јули. На пораката прикачи емотикон со скрстени раце и PDF документ со упатства за плаќање на сметка на American Express. „Можеш само да го испратиш тука“, додаде таа. На крајот, Детерс не ги уплатил парите, објаснувајќи дека со тоа ќе го уништи бракот. Преписката, дел од поширока комуникација што вклучува стотици пораки, е-пошта и писма, покренува нови прашања за активностите на амбасадорката на САД. Детерс, 63-годишен адвокат и поранешен ко-сопственик на синџирот ресторани „Снапи Томато Пица“, неуспешно се кандидираше за Конгрес и за гувернер. Во серија интервјуа, тој рече дека недостатокот на резултати го разочарал во администрацијата на Трамп. Детерс вели дека Гилфојл му рекла: „Ако ги набавиш парите за Ам-Експрес, јас ќе бидам твојот Трамп сојузник до гроб, засекогаш“. Но, тој додаде: „Таа никогаш ништо не оствари“. Пред сослушувањето во 2025 година, Гилфојл им се пожалила на пријателите дека нема пари. Нејзината свршувачка со Трамп Џуниор беше прекината претходната година. Во нејзината имотна картичка од февруари 2025 година, таа пријавила долгови, вклучително и заем за брод од 100.000 до 250.000 американски долари и хипотека помеѓу 1 и 5 милиони долари. Таа, исто така, пријавила имот, вклучувајќи медспа и нова компанија за вотка, и заработка од речиси 800.000 долари од подкаст. Таа сакаше да ја продаде вилата на Флорида што таа и Трамп Џуниор ја купиле за 9,7 милиони долари, но не можела да најде купувач за бараната цена од 30 милиони долари. Трамп Џуниор го исплати својот дел од куќата за 7,6 милиони долари оваа година.