Макрон: Ќе бидат искористени сите расположливи средства за да се спречат инциденти на протестите в сабота

Претседателот на Франција, Емануел Макрон денеска од Доха испрати предупредување до демонстрантите кои ќе протестираат в сабота.

– Тие кои сакаат да предизвикаат хаос во градските центри следната сабота ќе бидат спречени да го сторат тоа. Безбедносните сили ќе преземат решителни мерки, наведе Макрон.

Тој додаде дека ќе бидат искористени сите расположливи средства за да се спречат инциденти како на минатонеделните протести.

Макрон наведе дека утре ќе се консултира со безбедносните власти за да добие детален преглед на превентивното планирање, собирањето разузнавачки информации и безбедносните одговори за наредните недели.

Тој повтори дека не постои „легитимно насилство. Ниту вербално ниту физичко, ниту против имотот ниту против луѓето.

Француската влада продолжува со разговорите со претставниците на студентите и учениците, како и со социјалните партнери, за она што тој го нарече „легитимни барања“ на демонстрантите.

– Целта е да се слуша, сериозно да се сфатат загриженостите, несогласувањата, а понекогаш и гневот што постојат, да се адресираат основните причини и тоа да се прави на уреден начин, правејќи јасна разлика помеѓу овие проблеми и насилството што се врши, за што нема да правиме никакви отстапки, посочи Макрон.

Тој од вчера е на турнеја по земјите од Персиски Залив – Кувајт, Обединети Арапски Емирати, Бахреин и Катар – за да обезбеди резерви на гориво, што ќе доведе до намалување на цените на бензинските пумпи.