Администрацијата на Трамп предупредува: Центарот „Кенеди“ може да биде урнат ако судот го блокира неговото име

Администрацијата на американскиот претседател Доналд Трамп ја спомена можноста за уривање на познатата концертна сала Центар „Кенеди“ во Вашингтон, доколку судските власти го блокираат решението на управниот одбор за повторно поставување на името на Трамп на фасадата. Управниот одбор, во кој претседателот постави свои блиски соработници, во декември го додаде неговото име кон она на неговиот демократски претходник, преименувајќи ја салата во Центар „Трамп-Кенеди“.

По оспорувањето на законитоста од страна на опозициските демократи и семејството Кенеди, федералниот судија Кристофер Купер на 29 мај му нареди на одборот целосно да го отстрани споменувањето на Трамп и привремено ја поништи одлуката за затворање на салата. И покрај тоа што одборот ја почитуваше судската одлука во јуни, на 13 август повторно изгласа одлука со која се предвидува поставување натпис за улогата на Трамп во обновувањето на објектот. Во судските документи поднесени во понеделникот во пресрет на новото рочиште, Министерството за правда предупреди дека без признавање на заслугите на Трамп „донаторите нема да даваат средства“, што би го одвело центарот по „фатален финансиски и структурен пат“.

Според драматичните наводи во документите, состојбата на институцијата би се влошила до степен да стане опасна и руинирана зграда која на крајот „ќе мора да биде урната“, по што би се одлучувало за изградба на нови содржини, како што е амфитеатар на отворено со поглед кон реката Потомак. Додека одборот инсистира на итни поправки за да се спречи протекување на водата, судијата Купер дозволи продолжување на неопходните поправки, но нагласи дека секое ново затворање бара подетална проценка. Како одговор на правните блокирања, Трамп најави дека ќе соработува со Конгресот за целосно да ја пренесе контролата врз Центарот „Кенеди“.