Алепо – разурнат од војна и најпогоден во денешните земјотреси

Сирискиот град Алепо, кој е разурнат од војна, е меѓу областите кои се најпогодени од денешните смртоносни земјотреси, кои опустошија и делови од јужна Турција.

Спасувачките тимови за итни случаи соопштија дека многу згради се оштетени или уништени и оти под урнатините има заробени луѓе.

Во регионот живеат милиони бегалци раселени поради граѓанската војна.

Тоа е едно од местата под контрола на сириската влада, која сè уште се бори против опозициските сили. Делови од околните села се под контрола на бунтовниците.

Многу области во градот веќе беа урнати во конфликтот пред да се случи земјотресот.

Во северна Сирија досега се регистрирани повеќе од 1.000 загинати во земјотресот.

Бројот на загинати во областите под контрола на владата се искачи на 570, соопшти Министерството за здравство на земјата.

Во деловите под контрола на бунтовниците во северозападниот дел на земјата, според спасувачката група „Бели шлемови“, загинале најмалку 430 луѓе.

Контролата на северна Сирија е поделена меѓу владата, силите предводени од Курдите и другите бунтовнички групи кои се во конфликт.

Како што јави Би-Би-Си, не е сосема јасно колку жртви има во Алепо.

Можеби ќе ве интересира
Close
Back to top button
Close