Антитерористичка операција во Русија, убиени двајца милитанти

Двајца милитанти се убиени во антитерористичка операција во Налчик, главниот град на руската република Кабардино-Балкарија на северот на Кавказ, соопшти Националниот антитерористички комитет.

„На периферијата на Налчик беше спроведена антитерористичка операција откако беше утврдена локацијата на вооружените лица кои учествуваа во терористичките активности. Неутрализирани се двајца милитанти“, се вели во соопштението.

„Според достапните информации, двајцата милитанти убиени во кратка престрелка биле членови на банда која е дел од меѓународна терористичка организација. Тие планирале да извршат серија субверзивни и терористички напади во регионот“, се додава.

На местото на судирот е пронајдено автоматско оружје и муниција. Експерти за бомби од Федералната служба за безбедност (ФСБ) ја проверуваат локацијата.

„Немаше жртви меѓу службениците на ФСБ, Министерството за внатрешни работи, Министерството за вонредни ситуации и Националната гарда кои учествуваа во антитерористичката операција. Ниту еден цивил не е повреден“, нагласија властите.

Антитерористичката операција е започната во 5 часот и 12 минути по локално време, а операциите за пребарување и истрага се уште се во тек.