Цело Скопје се гуши во чад, пожари на повеќе страни го загадија воздухот

Главниот град на Македонија денеска се соочува со значително влошување на квалитетот на воздухот, објави 4news.mk Според последните податоци од глобалната платформа за следење на загаденоста „IQAir“, воздухот во Скопје е класифициран во категоријата „Нездрав“ (Unhealthy), со Индекс на квалитет на воздух (AQI) од 155.

Главниот загадувач се ситните честички PM2.5, чија концентрација на мерните станици (како онаа во близина на меѓународното училиште „НОВА“) достигна 61 µg/m³, што е неколкукратно над дозволените граници препорачани од Светската здравствена организација.

Воздухот во Скопје е дополнително оптоварен и од чадот кој пристигнува од активните пожари. Комбинацијата од високата температура од 34°C, ниската влажност на воздухот (27%) и слабиот ветер со брзина од 10 km/h придонесува за задржување на чадот и штетните материи во атмосферскиот слој над градот.

Здравствените власти апелираат до граѓаните од чувствителните категории (деца, постари лица и хронично болни) да ги намалат активностите на отворено, додека на останатите им се препорачува избегнување на подолг престој надвор и користење заштитни маски при поекстремна изложеност. (4news)