Ердоган во интервју за „Ен-Би-Си Њуз“: Хамас е група на отпорот која ја брани својата земја

Турскиот претседател Реџеп Таип Ердоган во интервју за американскиот „Ен-Би-Си Њуз“ изјави дека Хамас не го смета за терористичка организација, туку за група на отпорот која ја брани својата земја.

Ердоган, кој беше во Њујорк на 79. Генерално собрание на Обединетите нации (ОН), даде интервју за Кир Симонс од американскиот канал.

Турскиот претседател зборуваше за израелските масакри во Газа и одговори на прашање за односот на Турција со Хамас.

„Ние сме против терористите. Но, јас сум еден од лидерите кои многу добро го познаваат Хамас. Никогаш не сум го нарекол Хамас терористичка организација. И не го сметам Хамас за терористичка организација во моментов. Затоа што Хамас е група на отпорот што се обидува да заштити својата земја. Според тоа, како може таква група на отпорот да се нарече терористичка организација?“, рече Ердоган.

Одговарајќи на прашање за тоа што се случи на 7 октомври, Ердоган нагласи дека не треба да се заборави болката што ја претрпе палестинскиот народ пред овој процес.

„Од 1947 година до денес, Палестина ја губи и губи својата територија. Кога ќе погледнеме зад сцената, за жал, мора добро да ги знаеме причините што подготвиле такви услови за 7 октомври. Неопходно е добро да ги разбереме. А, кога ќе испитаме колку Палестинци се убиени зад параванот, има сосема поинаква слика“, објасни Ердоган.

Во делот од интервјуто кој се однесува на Украина, одговарајќи на прашањето како Анкара гледа на членството на Украина во НАТО, Ердоган рече дека ќе ги земе предвид чекорите на сите земји од НАТО по ова прашање.

„Америка воопшто не сака Украина да стане членка на НАТО. Многу земји на НАТО не сакаат Украина да стане членка на НАТО. Мора да донесеме одлука откако ќе ги видиме овие факти“, рече Ердоган.

Наведувајќи дека прашањето за членството на Украина во НАТО е прашање за кое треба детално да се одлучи, Ердоган рече „кога одлучуваме за овие прашања, секако дека ги почитуваме позициите на сите членки на НАТО и во согласност со тоа донесуваме одлуки“.

„Засега ставот на сите земји на НАТО е таков каков што е. Конечната одлука ќе ја донесеме следејќи го развојот на настаните. Овие одлуки не се носат со возбуда“, додаде Ердоган.