Европската комисија изрази длабока загриженост за случајот со професорката Васиќ од Нови Сад која штрајкува со глад во притвор

„Очекуваме властите да дејствуваат одговорно и да ѝ обезбедат соодветна медицинска нега“ изјави портпаролот на Европската комисија во одговор за регионалниот сервис на Радио Слободна Европа.

Професорката Марија Васиќ е меѓу шестемина активисти и студенти од Нови Сад кои беа уапсени пред два месеци поради наводен обид за соборување на уставниот поредок. По одлуката на судот притворот да им се продолжи за уште 30 дена, Васиќ почна штрајк со глад на 13 мај. Поради влошената здравствена состојба, таа во четвртокот беше префрлена од затворот во Нови Сад во затворската болница во Белград.

„Очекуваме условите за притвор да бидат во согласност со почитувањето на основните права, вклучително и човековото достоинство. Очекуваме да се почитуваат основните права на сите граѓани“,се додава во одговорот на ЕК во врска со приведувањето на активистите и студентите од Нови Сад и развојот на настаните по штрајкот на професорката Васиќ.

Европската комисија додава дека внимателно го следи случајот.

Шест активисти од Нови Сад, меѓу кои и професорката Марија Васиќ беа приведени на 14 март, ден пред масовниот протест во Белград, под обвинение дека подготвувале акт против уставниот поредок и безбедноста.

Семејството на Васиќ соопшти дека со денови нема никакви информации за нејзината здравствена состојба. Во меѓувреме, затворската управа издаде соопштение во кое се наведува дека сите информации за состојбата на професорката Марија Васиќ се достапни за јавноста.