ГАЛЕРИЈА+ВИДЕО: „Ја кренав жена ми и трчав“, „Избегав со децата. Сега немаме дом“…сведоштва од разорниот земјотрес во Мароко
Најмалку 672 лица се повредени, од кои 205 тешко, во земјотресот со јачина од 7,2 степени според Рихтеровата скала што доцна во петокот ги погоди планините на Високиот Атлас во Мароко, се додава.
Најголем дел од штетите и загинатите се во тешко достапни планински области, а повредените се превезуваат на лекување во болниците. Уништени се многу згради, а населението во паника ги напуштало своите домови.
Локалните медиуми објавија дека патиштата што водат до планинскиот регион околу епицентарот на земјотресот се заглавени со возила и блокирани од урнати карпи, што ги забавува спасувачките напори.
Според државната телевизија Ал Аула, земјотресот оштетил делови од историските ѕидини на Маракеш од 12 век.
– Лустерот падна од таванот и истрчав надвор. Сè уште сум на пат со моите деца и се плашиме – изјавила Хоуда Хафси (43) во Маракеш.
Монтасир Итри, жител на планинското село Асни во близина на епицентарот, рече дека повеќето од куќите таму се оштетени.
– Нашите соседи се под урнатините и луѓето напорно работат да ги спасат користејќи ги расположливите ресурси во селото – рече тој.
