Градоначалникот на Теарце, кому му починала сестра, не дозволил групирање за сочувство

Мобилизирање на локалните кризни штабови за директна комуникација со луѓето и нивно убедување да ги почитуваат мерките за заштита од ковид-19, наместо колективни рестриктивни мерки. Ова е насоката на која ќе се практикува сѐ почесто за намалување на ширењето на ковид-19, истакна од тетовско Теарце, главниот координатор на кризните штабови на општините и вицепремиер за европски прашања Бујар Османи.

– Затоа сме тука да се дадат личните пораки – нема никој да може да контролира однесување на луѓе освен ако секој од нас биде свој полицаец, свој лекар за себе и за своето семејство, а заштитните мерки се лесни, нема полесни заштитни мерки од носење маски и миење раце. Ова е спас за сите други рестриктивни мерки, дали тоа е полициски час или карантин или други потешки мерки. Локалните лидери и да почнат да зборуват со луѓето за опасноста од вирусот, да ги отфрлат теориите на заговор за непостоење на вирусот и да работат со луѓето да се издржи уште малку – рече Османи.

Локалните авторитети се тие кои сега ќе имаат поголемо значење и поголема улога, смета Османи, наведувајќи го градоначалникот на Теарце, Исен Асани, кој имал смртен случај, но не дозволил групирање за изразување сочувство.

– Ако тој тоа го направил кога му починала сестрата, дава личен пример како да се однесуваат и другите. Локалните штабови ќе ги потсетуваат луѓето да не се собираат во домовите и самите да придонесат за намалување на ширењето на заразата – рече Османи.

– Пред месец дена ми почина сестрата. Знаејќи ги обичаите, да дојдат дома за сочувство, не го дозволив тоа поради состојбата. За добро на семејството и за другите луѓе, мора секој да прави така, затоа што ни се зголемија бројките на заразени со ковид-19 во селата на нашата општина – рече Исен Асани, градоначалник на општина Теарце.

Општина Теарце досега има еден починат и девет излекувани од ковид-19.