Исклучително високи мерки на безбедност за дочекот на Новата година во Париз: Нивото на закана е високо

Франција ќе распореди голем број полицајци и војници на улиците за новогодишната прослава овој викенд поради „многу голема“ терористичка закана, изјави францускиот министер за внатрешни работи Жералд Дарманин.

90.000 полицајци ќе бидат распоредени низ целата земја, од кои 6.000 ќе бидат во Париз. Ќе бидат распоредени и 5.000 војници од антитерористичката единица.

„Побарав многу големо распоредување на полицијата и безбедносните сили, со оглед на контекстот на многу висока терористичка закана поради, очигледно, она што се случува во Израел и Палестина“, изјави министерот за новинарите. Европските безбедносни претставници предупредија на зголемен ризик од напади на исламистите радикализирани од војната меѓу Израел и Хамас.

Германската полиција ќе ги зголеми безбедносните мерки во катедралата во Келн за време на новогодишната ноќ, изјави денеска функционерот задолжен за тој дел од градот. Ова е за да се спречат можни напади, изјави Мартин Лоц. „Не можам да навлегувам во природата на нападот овде“, рече тој.