Издаден налог за апсење на Јун поради обид за воведување воена состојба

Судот во Сеул денеска издаде налог за формално апсење на соборениот јужнокорејски претседател Јун Сук-јеол поради неговиот неодамнешен неуспешен обид да воведе воена состојба.

Западниот окружен суд во Сеул го издаде налогот врз основа на наводите дека Јун водел бунт и ја злоупотребил моќта кога прогласил воена состојба на 3 декември, објавија јужнокорејските медиуми.

По издавањето на налогот, истражителите можат да го задржат Јун во притвор до 20 дена, вклучувајќи ги и деновите што тој веќе ги поминал во притворен центар по неговото апсење во неговата резиденција во Сеул во средата.

Обвинителството се очекува да ја продолжи истрагата и да го обвини пред да истечат 20-те дена.

Јун се појави вчера пред судот, кој ги разгледа аргументите за и против неговото апсење.

Јужнокорејскиот парламент го отповика Јун на 14 декември поради воведување воена состојба.