Каракачанов контра Борисов по неговата средба со Заев: Политиката што ја браневме не е на распродажба само за да му се додворите на Западо
Тој во својата објава директно му се спротивставува на доскорешниот коалициски партнер Борисов, оценувајќи дека тој ја погазува политиката што заедно ја воделе кон Македонија додека биле во владата само за Борисов да остави добар впечаток на Западот.
„Не можете да плукате по достоинството со вртење грб на одлуката што ја браневте како премиер, само за да им оставите добар впечаток на некои фактори на Западот. Политиката што ја браневме заедно до вчера, а особено националните интереси на Бугарија и сеќавањето на сите оние што ги дадоа своите животи за бугарштината во Македонија, не се на продажба ниту, пак, се монета за поткастрување за политички цели дома“,
вели Каракачанов.
Тој, исто така, додава дека неколку гласа повеќе, на кои било избори, не можат да бидат по цена на националниот интерес.
„Ние патриотите, и јас лично, 4 години се боревме за достоинствена бугарска позиција, да не дозволиме РС Македонија да преговара за членство во ЕУ сè додека тамошните политичари не го препознаат едноставниот факт дека нашата историја до 1944 година е заедничка, додека не ги исчистат учебниците по историја од јазикот на омраза и лаги, влевајќи омраза кон Бугарите и Бугарија. Додека нашите сонародници околу Вардар не ги добијат своите законски човекови права. Ова е политика што ја наметнавме како Бугари и јас не се откажувам од неа“,
нагласува лидерот на бугарската партија ВМРО.
Од партијата на Каракачанов, пак, најавуваат дека младината на бугарското ВМРО ќе го пресретне Заев пред бугарското Претседателство за да му кажат дека од двете страни на границата живее еден народ.
„Во исто време, денес во 15 часот младината на ВМРО ќе се сретнат со Зоран Заев пред Претседателството, за да го пречекаат во нашата заедничка татковина. Со овој гест тие ќе покажат дека сме еден народ од двете страни на границата“,
посочуваат од партијата