Кривичен суд за Груевски: Казната за „Тенк“ застари, активни остануваат две потерници и две судења

Основниот кривичен суд Скопје излезе со официјални информации до јавноста во врска со статусот на судските процеси и затворските казни за поранешниот премиер Никола Груевски, по предметите кои ги застапуваше поранешното Специјално јавно обвинителство (СЈО)

Судот потврди дека една од казните е веќе застарена, но дека против него сè уште има активни потерници и судски процеси.

Застарена казната за случајот „Тенк“

Кривичниот суд информираше дека затворската казна од 2 години за предметот „Тенк“ е официјално застарена.

Во овој случај, Груевски беше осуден за кривичното дело Примање награда за противзаконито влијание. Пресудата стана правосилна на 4 октомври 2018 година. Согласно законските рокови предвидени во Кривичниот законик, апсолутната застареност за извршување на оваа санкција настапила на 4 октомври 2024 година, по што судот по службена должност донел решение за застареност.

Активни потерници и затворски казни

И покрај застарувањето на случајот „Тенк“, против Никола Груевски во моментов се активни две меѓународни потерници за извршување на затворски санкции по следните правосилни пресуди:

„Насилство во Центар“: Затворска казна во траење од 1 година и 6 месеци.

Рок на застарување: 10 септември 2027 година.

„Плацеви на Водно“: Единствена затворска казна во траење од 9 години.

Рок на застарување: 14 февруари 2043 година.

Дополнителна казна: За истиот предмет изречена е и парична казна која не е наплатена, па истата е заменета со казна затвор од дополнителни 180 дена (чие извршување застарува на 14 февруари 2027 година).

Судења во отсуство

Освен правосилните пресуди, од Кривичниот суд потсетуваат дека против поранешниот премиер се водат и активни судски постапки во кои му се суди во отсуство, бидејќи тој е недостапен за органите на прогонот.

Станува збор за предметите кои во јавноста се познати како „Титаник“ и „Талир 2“.