Курти: Има уапсени лица и материјални докази поврзани со нападот на водоводниот канал во Зубин Поток, северно Косово

Косовскиот премиер, Албин Курти, кој денеска го посети местото каде што синоќа се случи нападот со експлозив врз водоводниот канал Ибар-Лепенец, информира дека полицијата извршила рација и дека има уапсени лица и материјални докази, јави дописникот на МИА од Приштина.

Обраќајќи се пред новинарите во селото Варага кај Зубин Поток, Курти порача дека „сите криминалци и терористи кои го предизвикаа нападот ќе се соочат со косовските закони“.

Курти информира и дека е постигнато делумно санирање на оштетувањата на каналот.

– Успеавме до некаде да ја санираме штетата. Некаде сме на нешто повеќе од една четвртина од водните текови на каналот, кој исто така ги лади електраните и снабдува со вода. Полицијата води истраги, има рации и апсења, како и материјални докази и сите овие криминалци и терористи ќе се соочат со правдата и со законите на демократска Република Косово, рече косовскиот премиер.