Меси на 6. октомври за последен пат во аргентинскиот дрес

Еден од најголемите фудбалери на сите времиња, Лионел Меси, ќе го одигра својот последен натпревар за аргентинската репрезентација на 6 октомври на стадионот „Монументал“ во Буенос Аирес против Бенин, објави денеска Аргентинската фудбалска асоцијација (АФА).
Триесетидеветгодишниот Меси објави пред две недели дека се повлекува од настапите за репрезентацијата бидејќи „нема што повеќе да придонесе“.
Претседателот на АФА, Клаудио Тапија, го опиша пријателскиот натпревар против Бенин како збогување на Меси со репрезентацијата во неговата татковина „што тој навистина го заслужува“.
„По разговорот со селекторот Лионел Скалони, решивме да го поканиме најдобриот играч во светот, нашата икона и капитен Лионел Меси во Аргентина на 6 октомври за да се збогува на начин каков што навистина го заслужува. Ги покануваме сите светски шампиони од Катар да ни се приклучат во „последниот танц“ што ќе биде незаборавен за сите навивачи‘, соопшти АФА.
На натпреварот против Бенин Скалони ги повика сите членови за репрезентацијата, која предводена од Меси, го освои Светското првенство во 2022 година во Катар.
Меси досега одигра 207 натпревари за Аргентина и постигна 125 голови. Покрај Светското првенство во 2022 година, два пати беше светски вицешампион (2014, 2026), освои две титули во Копа Америка (2021, 2024), како и златниот медал со олимпискиот тим на Игрите во Пекинг во 2008 година.