Најмалку едно лице загина, 17 се повредени во руски напад врз Дњепропетровската област

Во напад на руските сили врз Дњепарската област загина едно лице, а бројот на повредени се зголеми на 17, соопштија локалните власти.

Началникот на Дњепропетровската администрација, Олександар Ханжа на својот канал на Телеграм напиша дека бројот на повредени во „непријателскиот напад во Дњепарскиот округ се искачи на 17“, пренесува Укринформ.

Тој додаде дека седум лица се хоспитализирани. Според него, во тешка состојба се наоѓа 65-годишен маж, додека уште еден маж на 33 години и жени на возраст од 28, 35, 43, 44 и 54 години се во средно тешка состојба.