Трамп жали што номинирал тројца судии на Врховниот суд
Американскиот претседател Доналд Трамп изјави дека жали што ги номинирал тројцата судии на Врховниот суд — Нил Горсуч, Ејми Кони Барет и Брет Кавано — кои се спротивставија на неговите ставови во неодамнешните пресуди, објави списанието „Тајм“.
Републиканскиот претседател одговараше на прашања за неговите неодамнешни коментари упатени кон тројцата конзервативни судии, во интервју што беше спроведено во понеделникот.
„Дали жалите што ги номиниравте?“, го праша новинарот во врска со реакцијата на Трамп претходно објавена на неговата социјална мрежа „Трут соушл“ (Truth Social).
„Да. Да“, одговори Трамп, според транскриптот од интервјуто.
„Што можам да направам? Јас ги поставив. Премногу често гласаа против мене. Бев многу… Им дадов доживотен мандат, а тие често гласаат против мене“, рече Трамп.
Трамп ги номинираше Горсуч, Кавано и Барет за време на неговиот прв претседателски мандат, со што во Врховниот суд беше формирано конзервативно мнозинство од шест спрема три, овозможувајќи му на Судот значително да се придвижи десно по 2020 година.
„Сакам лојалност, да“, му рече Трамп на новинарот, кој потоа го праша дали истото го очекувал и од судиите.
„Не, не сакам лојалност. Сакам добри одлуки“, одговори Трамп.
Откако највисокиот американски суд одби да го одобри правилото на Поштенската служба со кое се ограничува употребата на гласачки ливчиња испратени по пошта за конгресните избори во ноември, Трамп изјави дека судиите што ги избрал се однесуваат поинаку во споредба со периодот кога разговарал со нив за нивното именување.
„Тоа не се луѓето со кои разговарав за работа во Врховниот суд на САД, тие се само сенка од она што беа“, напиша тој на мрежата „Трут соушл“.
Откако Судот во февруари ги укина неговите сеопфатни глобални царини — за кои утврди дека незаконски ги вовел со повикување на закон наменет за вонредни состојби — Трамп упати посебни критики кон Горсуч и Барет, кои гласаа со мнозинството во одлуката донесена со шест гласа „за“ и три „против“.
