Путин не остава простор за преговори: Безбедносната зона долга 660 километри во Украина не е предмет на договор
Рускиот претседател Владимир Путин изјави дека Москва воспоставува безбедносна зона на украинска територија долж границата со Русија и дека нејзиниот статус нема да биде предмет на идни мировни преговори со Киев.
Путин рече дека операцијата е одговор на украинската воена операција во рускиот регион Курск во 2024 и 2025 година. Според него, руските сили успешно ја спроведуваат задачата за потиснување на украинските единици и воспоставување безбедносна зона на соседната територија.
„Нашата цел е да обезбедиме апсолутна безбедност на граничните региони на Русија во иднина и не планираме ова да биде тема на потенцијални мировни преговори со Украина“, изјави Путин.
Портпаролот на Кремљ, Дмитри Песков, соопшти дека планираната зона се протега на 660 километри, од кои 70 проценти во моментов се под руска контрола. Тој не прецизираше колку длабоко во Украина ќе навлегува зоната.
Иако Путин и претходно зборуваше за потребата од воспоставување ваква зона, досега не го соопштил нејзиниот планиран обем, ниту јасно посочил дека нема да преговара за неа. За нејзино воспоставување би било потребно руските сили да освојат дополнителни територии во украинските региони Суми и Харков, кои не се меѓу регионите што Москва незаконски ги анектираше во 2022 година.
Путин, исто така, изјави дека руските сили сè уште немаат освоено нешто повеќе од 10 проценти од територијата на Доњецк и 16,5 проценти од регионот Запорожје.
