Шаховскиот гениј Каспаров од Софија порача дека војната се води и онлајн
Поранешниот светски шаховски првак, експерт за вештачка интелигенција и критичар на режимот во Кремљ, Гари Каспаров, изјави дека војната во Украина несомнено стана пресвртница во историјата
Каспаров, кој учествуваше на конференцијата во Софија за прашањата на одбраната и кибер-безбедноста на земјите од Југоисточна Европа, рече дека тоа е важна лекција и треба да биде потсетник за способноста на слободните луѓе да одговорат на сите предизвици. Според него, на почетокот на воените акции во Украина, Русија извршила масовен напад на сите фронтови – воена офанзива и кибер-напад од големи размери.
Каспаров нагласи дека кибер-војната не треба да се одвојува од реалните воени операции.
– Војната во Украина се води и онлајн и офлајн, демонстрирајќи ги предностите на слободниот свет – рече тој.
Форумот е организиран од израелската платформа ImImprovate, а домаќин е Росен Плевнелиев, претседател на Бугарија (2012 – 2017), кој е во советодавниот одбор на платформата.
На саемот учествуваше и заменик министерот за одбрана на Северна Македонија, Башким Хасани. Тој изјави дека Владата на Сeвeрна Македонија посветува посебно внимание на развојот на сопствените капацитети за кибер-безбедност, чија главна цел е заштита на националните интереси на државата, јавува дописникот на МИА од Софија.
Во рамките на дискусијата посветена на влијанието на војната во Украина врз развојот на вооружувањето и тоа дека руската инвазија суштински ја промени светската агенда во однос на геополитичките процеси, безбедносни, економски и хуманитарни аспекти кои влијаат на безбедносниот аспект во Југоисточна Европа, тој истакна дека се соочуваме со кибер, хибридни и други асиметрични закани, кои вклучуваат и кампањи за дезинформација.
На конференцијата учествуваше и поранешниот македонски премиер Владо Бучковски, кој рече дека Русија влијаела на развојот на регионалните процеси, посочувајќи на нерешениот дијалог меѓу Белград и Приштина, поддршката на одредени сили во Босна и Херцеговина, политичката криза во Црна Гора, како и обидот за одржување референдум против Договорот со Бугарија од страна на опозицијата, кој, според него, создава ризик за политичката стабилност во односите меѓу Софија и Скопје.
