Зошто сè повеќе непушачи заболуваат од рак на белите дробови?
Ракот на белите дробови е водечка причина за смрт од рак кај жените, а податоците покажуваат дека повеќе жени умираат од овој тип на рак отколку од рак на дојка, јајчници и дебелото црево.
Американското здружение за бели дробови наведува дека стапките на рак на белите дробови се зголемиле за 79 отсто кај женската популација во текот на изминатите 40 години, додека кај мажите се намалиле за 43 отсто.
Како што објави The Conversation, за прв пат во историјата има повеќе жени на кои им е дијагностициран рак на белите дробови отколку мажи. Некои истражувања сугерираат дека тоа е затоа што жените се малку почувствителни на канцерогените ефекти од изложеноста на чад од тутун, вклучувајќи го и пасивното пушење, и на тој начин може да развијат рак на белите дробови по помалку години пушење во споредба со мажите.
Исто така, онкологот Естеламари Родригес нагласува дека повеќето луѓе на кои неодамна им бил дијагностициран рак на белите дробови не се активни пушачи, а дури 20 проценти од заболените жени никогаш не запалиле цигара.
Покрај пушењето, постојат неколку други фактори на ризик поврзани со ракот на белите дробови кои би можеле да објаснат зошто повеќе непушачи ја развиваат оваа смртоносна состојба. Тие вклучуваат семејна историја на рак, изложеност на азбест, радон и зголемено загадување на воздухот, објаснува Родригес.
Изложеноста на канцерогени материи на работното место, која првенствено вклучува вдишување хемикалии како што се арсен, силициум и никел, сè уште е проблем во одредени делови од светот, додека потенцијалниот ризик од рак на белите дробови од вдишување на чадот од популарните електронски цигари сè уште е во фаза на истражување.
