Поскапуваат бензините – ова се новите цени
Од полноќ се зголемуваат малопродажните цени на бензините еуросупер БС-95 и еуросупер БС-98 за еден денар за литар. Цените, пак, на еуродизел (Д-Е V) и на Екстра лесното масло за домаќинство на (ЕЛ-1) се зголемуваат за половина денар за литар.
Ова денеска го соопшти Регулаторната комисија за енергетика, водни услуги и управување со комунален отпад (РКЕ), од каде велат дека малопродажната цена на мазутот М-1 НС, се зголемува за 0,626 денари за килограм.
„Од ноќеска на полноќ максималните цени за моторен бензин-еуросупер БС-95 ќе биде 84 денари за литар, за моторен бензин-еуросупер БС-98 е 86 денари за литар, дизел гориво еуродизел БС (Д-Е V) е 77 денари за литар, Масло за горење – Екстра лесно 1 (ЕЛ-1) е 75,50 денари за литар, мазут М-1 НС е 48,634 денариза килограм“ информираат од РКЕ.
Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.
